تطوان العتيقة
شعـر
هــــو وهـــــــــــــــــــي
بقلم الفنانة الشاعرة جميلة العلوي المريبطو
*****
هو
أَجِي يا الزَّيْن المْمْشوق
معك حياتي عْرْفْتْ الرّْشُوق
وحلا الحب و حلا الشوق
أَجي يا السُّكَّرْ بالمْسْكْ المْدْقُوقْ
أجِي يا الفْنّْ و العَنْبَرْ المْعْشُوقْ
من هوايا نْعَبِّي و نْجِيبْ و نْسُوقْ
هي
انا ..انا هي الورْقة المشقوقة
انا .هي.الوردة الذبلانة المحروقة
انا سَهْمي ...غير النظرة المسروقة
قلبي طايب و الدمعة في عيني مخنوقة
ناسي كلامك و تقلِّي أنا المعشوقة ؟
هو
علاش يا للا الحبيبة ديالي
واش مَكْفَاكْشِي حَرّْ الليالي ؟
كل نهار نغني بيك و نْلاَلِي
صوتك و قوامك ما يفارق خيالي
نمشي ونجي و ما تزول من بالي
انْتِناَ حبي انت احلى ما جرالي
هي
ايام و ليلالي و الغبينة فيا
القمر يتحاور مع النجمة القطبية
و الشمس تشرق وتسال ما بيا
و يجي السحاب ويْطَبْطَبْ عْلِيَّا
نفكر ونقول علاش انا مفنية ؟
شْوْقَاعْ بَيْنْ الصّْباح و العشية ؟
من قْبْلْ كنت تموت وتحيا بيا
و دابا شبعتِ ومابقات فبالك نية
واش نسيت العهد اللي قطعتو عليا؟
او حتى تقاضى هدير العَيْلَة المْشّْهِيَّة؟
وصْبْحْتْ أيامي مْرْزِيَّة
مْلْكْتْنِي و صبحت عبدة مشرية
وبغرامك وهواك نبقى ديما مسبية
مشا وقتي
ما بقيت حْلْوَّة ما بقيت مزية
هو
يا للاَّ انتنا الهوا انتنا الروح
عليك نموت و نْتْمَدّْ في تابوت اللُّوحْ
انا مقهور بحالي ..انا مجروح
عْطَارْ وجودك فاين ماكنت يفوح
انا مزاوك فيك خلي قلبك مفتوح
عيني طابت
عليك نبكي وعليك النوح
لا تشد بيبانك
خلي القرب منك مسموح
الجهد غلبني
والحب من قلبي ما يروح
الزمان غدار
و المسكين اليوم ممسوح
هي
و أنا كيف نكون حين يْتْفْشَّىا سْري ؟
نصبح على لسان اللي يبيع و يْشْرِي ؟
تقت بك ومن هواي فوضت لك أمري
حسبتك رجل حر و من دارك عزري
صْدَقْتْ كَنْحارْبْ و بْوَحْدِي كَنْجْرِي
حْصَلْتْ وهْبْطْ كُلّْشِي عْلَى طَهْرِي
مشا زماني و فنيت عليك عمري
و دابا كيف نْفُكّا و انت سبب قهري
واش نتنا الحب
أَوْلَا الطّْبْخَة اللِّي في صْدْرِي ؟
و اش نتنا العْمَار اللي مشىا على بْكْرِي ؟
قُلِّي . قُلِّي. يا الِّلي بنيت معاه قصري.
و قسْمْت معاه هنايا وزماني و زهري
هو
الحل عند مولانا
قريب ما هو بعيد
النهار الي تكون فْشُوني
انا عندي عيد
هي
يا ريت ...
وشكون يعطي العيد نلعبيد؟
انا عييت
كل مرة تجيني بوعد جديد
هو
يا بنت الناس ربي عندو كل خَيْر
سْرّْكْ في بير مَعَرْفُوشِي حْتَّى الطَّيْر
هي
يا ولد الناس الحال طال عليَّا
هذا َحَدْ النهار ما بقا من الصْبَر وْقِيّة
نسا الهنا والسْلوى ونسا الشْجِيَة
ونْسَا العشق اللي خرْجْ عليك و علياَ
ليست هناك تعليقات:
إرسال تعليق