تطوان العتيقة
شعر الزجل
العيب فيهم ولا فينا؟
بقلم وريشة الفنانة الشاعرة
جميلة العلوي المريبطو
العيب فيهم ولا فينا؟
(من ديوان – خيط الروح -)
-----
قالت... دمكم بارد في الفرحة و في المحنة
ما ضربو ما تهربو ما تقّدو على فتنة
قلت
سيد النبي وصانا... على الثبات و الرزانة...
ما نضربو حد... حتى يجري مورانا
المهم نْخَرّْجو الشوكة بلا دم
و تبقى العشرة مزيانة
العداوة ثابتة و الصواب يكون
و السفينة تخلف بجاه النبي وربي مولانا
واذا حكم القضا... الله يآ ذي من آذانا
قالت
كتقنطو من الضيف........ وتحسبو ليه الأيام
قلت .....
من طبعنا التاويل و النظام........ و ضيافة النبي ثلاثة أيام
قالت...انت اللي كتمدح في بنت بلادك
وعملتها الاولى في الصفوف
غير يكثر عليها الحمل
تعيى و تشكي من الوقوف
قلت
يا للا الضيف اذا جا........ نهزوه بين الكفوف
نفرحو بيه و نصونه........ فحال البديع فوق الرفوف
لكن
عزة نفسنا ما تسمح........ نقضيو باللي كان
لازم نزلو اللي يصلح .... البرارد د الرايط..... و البلار في
الكيسان
بالقد او بالعوم نزينو حالتنا ........ ونبانو فحال الملوك بالتيجان
العيب و الحشومة عليها تربينا........ و الكلام خْصو يكون بالميزان
قالت...
الشحة و البخل ........ التطواني مولاها
قلت
الشي من الشي نزاهة........ و الشي من قلة الشي سفاهة
قالت........
في وجاه الناس كتشد ببانك
وبالحيلة والفن كيفلتك لسانك
قلت....
اللي جا ندار ك جا نعارك........ وشد بيبانك لا تْسَرَّقْ جيرانك
قالت...
نيتكم غارقة و همكم مغلف...
تبيعو وتشريو في بنادم... والبراني معكم متلف
قلت...
الهم هم دارنا, . وعلاش نشطنو بيه حبابنا؟
كنقسموه مع ولادنا.
وكنغطوا نارنا برمادنا...
اما الفرح... فكنوصلوه لجيراننا
و كنعرضو ليه اصحابنا
و يا للا احنا اولاد اليوم
مرحبا بيك لداري
نخدمك بشفاري و ظفاري
قالت
بسم الله علي ,,,,,بغيت تقتليني بالجوع؟
قلت
لا حول و لاقوة الا بالله
الله يا اللا نسيدي ربي الرجوع
قالت
انا قلت اللي في قلبي
و دابا ضحك ولا بكي بالدموع
قلتلها ياك؟ جْلّْسْ الهبيل..... و شتملو في ناسو ؟
الناس كلها ناس ....الظرف اللي كَيْحَكّْمْ راسو
قالت
اللي جا بعاينو شاف ..... قطاع ياسو و شلل ضراسو
قلت
حسبي الله و نعم الوكيل..... سعدنا و سعد هاد المدينة
فحال الجنان د اليهودي..... المكلة فينا و اللعنة فينا
... الشكوى لله هو اللي يمنع هو اللي يعطينا
العيب فيهم ولا فينا؟
ليست هناك تعليقات:
إرسال تعليق