طلعت القمرة

تطوان العتيقة
شعـر

طلعت القمرة

بقلم وريشة الفنانة الشاعرة جميلة العلوي المريبطو

*****

عايْشَة بالقُفَّة و البراد و القوام ......

العشِيَّة عَشَّاتْ و البْحَارْ طاسَة دالزيت

ماما وللا عملو القب و اللثام ....

الّْلبْدة في اليدّْ وخرجو من البيت 

على المَوْجَة تجمّْعو الجّْمِيّْعَاتْ 

كُلّْشِي عاينو في الما...

كلشي عاينو في السّْما 

و انا معرفت شْكايْن تمَّا..

و النّْدُّو فِيَّا ...شْكايْن ا مَامَّا ؟

ماما كَتْهْضَاْر وتْهَضَّارْ

و عاينا ما زالو من البْحَارْ 

الناس هابطين بالقفول 

و انا نموت و نعرف شكاين 

و كولاه موجهين نلبحار و تقول

واحد يجلس هنا و واحد.. راااا فاين 

و انا خْصّْني نمشي نْمَارْشَا بْيِي 

نهز ماما و نحوكَّا و نقولَّا عْلَايْنْ؟

والبَاسْلَة دْعَايْشَة عْلِيَّا بالفْهَايْمْ 

غارقة مع الكيسان دَاتَايْ

و انا زَعْمَا.. رَاسْ المْحَايْنْ 

مْطْبوخَة على قلبي مْحْمُوقة على الفتاين 

فْتِيوْتَة دالصّْبار ما فِيَّاشِي

و القْلَقْ فِيَا ما عرافتو مْنَايْنْ 

هزيزة و كنسمع الله !!! ...الله. !!!..

سبحان الله ..سبحان الله 

من قَلب البحار طلّْل القمر

دارة ْمدْوّْرَة تْسْلْبْ النّْظَارْ 

ناضت خالتي و صاحِبْتا معاها

شْبْطْتّْ فيها خْصّْني نْمْشِي معاها 

و لَللَّا طايْحَة بالندو .

.استنطاق فوياخ ماشية و فوياخ ماجية 

طلعنا ووصلنا نمارشا بيي

وماما مع للا بقات في الحاشية 

البنات جميعات خرجت تْسَّارَا

اللي طلعت من البحار و اللي خرجت من دارَا 

و طبعا , جميعات اخرى دْلْعْزَارَا 

الطالع يلقى الهابط تكفيهم النظرة 

كلام العين بدا في البلايا 

و كيكمل مع الليل و السمرة 

اذا عماها الله البنت ,و هضرت مع الولد..

في الدار تَكْلاَ في طَهْرا 

الزين طبيعي لا كحول لا عكَّار 

خُذْ ما عطاك الله شِي شَعْرُو كحال

شِي شَعْرُو زْعَار 

كولونيا و الوجاه مغسول

والخْدِيوْدَات من القايلة دلبحار

العينين خُضار كانو طرفة 

اليوم بالكِيلُوسْ فْ القُفَّة 

البنت كانت بالهِمَّة و الشان 

يْحْفَى الولد قبل ما يفرح بالصحبة 

و النية صالحة ,غالبا الحب كيكمل بالخطبة 

مارتيل كانت بناسا 

اللي تْجْبْرُو في السوق

تْجْبْرُو في البْلَاسَا 

اللي كيبيع الكازوز في الصباح 

معروف بكوكا. !!!.. و باردة !!!! 

و العشية يغني بطايب !!! و هاري !!!!

و الطنجرة دالتميلحات واجدة 

مول البيبة معروف 

كَيْحَمّْصَا فْ الفرَّان دالدّْفُوفْ 

ما شاء الله, اليوم كُلّْشِي مكشوف 

خسارة .. ولللاسف... كلشي متلوف