تطوان العتيقة
شعـر
شعـر
حَكُّوزَة
بقلم وريشة الأديبة الفنانة
جميلة العلوي المريبطو
*****
دْخُلْنا نْالدًّار العينين مْفْلّْتين
حكوزة ماجية في هَادْ الليلة
الفرحة والخوف فينا مْخَلّْطِينْ
كَنْخَايْلاَ فحال الْمْرَا دْ الرّْمِيلَة
عْجُوزَة و بشيعة و عاينا مْبْلْطِينْ….
و كَتْرْجَعْ تحت الباب دودة طويلة
ماما في القوشِّينة كتطلق التريد
و السْرّْ في الدار تقول عندنا العيد
شْيٌّوخة كتبخبخ في الطنجرة ….
بالزرع و الفول و الحميص كتفيط
انا ماشية ماجية فيا الحسرة….
الطباق دْ قَشْقْشَة مْسَقَّطْ مْلَقَّطْ بالكٌونْفِيطْ
تعشِّينا و نشطنا و غنينا
و تّْعْطَا طبيسل د قشقشا نكل واحد فينا
الكبار صطابو راسم ….
و كلاو اللي في شهوتم
و احنا لبوهال دْ شّْدوق ….
اخترنا لمزيون و خليناه
باش حكوزة تذوق
قلبي كيتقطع خلليتلا زينا و عاينا
ولكن فرحانة كَنْتّْنَّا شماش تسوق
نٌوضْنَا نّْعْسٌو و انا حلف النعاس مايجيني
ننقلب و نتشقلب و نرجع على يميني
حرام ..ليلة مننساها على طول سنيني
كنخاف تجي وانا فايقة… تمشي وتخلليني
كازت ساعة ..ساعتاين …اللي فيا مايهنيني
الخلعة و قلبي كيدق وهرب عليا لغطى
و شكون يغطيني
هزيزة و كنسمع الهدير كيقرب ….
مْتشّْفتشِّفَة بالعرق وفاينو نعاسي
تجمدت في موطعي و ما قدرت نركب
ديكشي كيزيد يقرب نعند راسي
شي حاجة نزلت قُدَّامِي….
صوت حاني دْ بَّا و دْ عْمَامِي
أنا تقلبت و كنشوف
ماما جرت و خرجت ….
الضو مطفي لكن الهدية نزلت
عرفت شكاين و القضية تفضحت
المشكل بقيت بالبيطة فيا
مانا نْهْضَر مانا نخلِّيها فيا
الغبينة هي دْ قَشْقْشَة اللي فالسّْبْنية
عبَّاوْهَالِي وانا عارفة القْضِيَّة
ليست هناك تعليقات:
إرسال تعليق