الحكاية صبحت عادة
و الشرمة تفرَّخ و تعطي فولادا
-----------------------------
عزيز من عرس تْطَّاوني
توجّْد وتّْوْلْ بالشان والعناية
عدّْلت حالي و زيّْنت راسي
و مشيت عند حبابي و ناسي
قلت هدي صحبتي حبيبة
فحال اختي عزيزة و قريبة
حشومة ,المفروض نمشي بكري
مشي فحل البراني كنْوجْد على خطري
فكيت داغيا و مشيت كنجري
وصلت نلقاعة و كانت تقريبا خاوية
فريجة مبهجة وغزالة و ضاوية
ناس العروسة يلقاو فالباب
مشوقين يفرحو بلحباب
دخلت و جبرت الطيافر خاويين
غير حبيبات دالناس مترشين
فرحت و بديت كنختار
التواسع و بنادم باقي فالدار
قصدت اللولي جبرتو عامر بالشيلان
زيدت نالثاني حضارين فيه السيكان
الثالث و الرابع و الخامس و السادس
كلشي عامر وكل واحد عندو حارس
فكل طيفور
المرا كتجري عليك غير بعَيْنا
متفكرشي تجلس ! ! !... الشال جالس ! ! !
مجبرت فين نكون.... ما بقى كلام
جاني الطّْحيك حسيت براسي فالحمَّام
غيرالما سخون و السطول ناقصين
اما الطيَّابات حضَّايين بالواجب قايمين
جبرت ركينة تحت الدروج
قلت مشي مشكل نحمد الله
ساعة تكوز وخا بالدبُّوز
جلست مطبوخة حدا مرا كبيرة
قالت لي: نض الموطع عامرة
و هدي حريرة ليلا حريرة
قلتلا بمن ؟منكشوف حد
قالت الناس ماجيين من الصويرة
تكيت على يدي و صدقت واقفة
يا ربي شماش نعمل ؟
عملولي فحال الكويرة
حشمت من صحبتي
ما نا نمشي ما نا نبقى فحيرتي
الحاصول جلست فوحد الدخشوش
ماكنشوف من الناس غير القشوش
مكرهتشي نداري نمشي
بلحق على وجاه شي كيكوز شي
بداو داخلين الناس بالقفول
و الله ميجلسو.. و تقول !
اللي يدخل خصو كرسي
مشي فحالي تكيت على نفسي
وقعت الفوضى والسربايين ساخطين
عمر الوسط وهذا متكي فهذا
و الطيافر... بااااقيين خاويين ! !
لا ! ! !...سمحولي
فيهم الشلالاق حاضيين
منبعد وحد السعتاين
عاد شرفو صحاب الفخامة
اللي بسبابم نايضة القيامة
موطعم محيوزة ما همشي دلعذاب
ما شراوها ما كراوها
غير كرفصو لحباب
و قلت
شنو هادشي اللي وصلنالو ؟
حرت, ما بقيت فاهمة والو
الحيا مات والحشومة هربت
الأنانية حمت و التقصديرة شطحت
لا حول و لا قوة الا بالله
اليوم اللي عملت واحلة
مشيت بكري او مشيت معطلة
في الحالتين الجلسة غتكون مبهدلة
