تطوان العتيقة
شعــر وفن
حرام عليك ...مش عليا
الفنانة الشاعرة
جميلة العلوي المريبطو
*****
حرام عليك ...مش عليا
الما كان صافي و جاري
….بين الحجار الصَّم عمْل طريقو
الفل و الياسمين على الورد حاني…
. و قطر الندى . يلمع.. ويقول كيف يفيقو؟
.القلب دق وشق
و من نعاسو فاق
..و سلّْم حالو نرفيقو
العطرشة.. تضخ بعطرا ليلة الهوى.
....و البنفسج يدغدغ شقيقو
والعشق و الهوى تمكن من حالي
...نموت ونحيا به وشكون يطيقو
العنبر مع مسك الليل يعطر مكاني….
و سحر الهوى تمنجل عليا
نكحل و نسوك ونبخر بالعود القماري ...
و نستنى فوياخ تطلل عليا
و انا بغرامك نغني اه يا زماني….
ونفنى مع المواول كل عشية
كنت غافلة و الحب عماني
…. شفت الزهار و الدالية عطية
و غفلت على الشوك اللي في جناني….
الله ربي.. الله ربي
..يشوف من حالي و يحن عليا
حرام عليك.... مش عليا
كنت سيدي و حبيبي و هوايا…
. ثقتي فيك ما كان لها حدود
أنت في ارضي و ربي في سمايا…
. القمر بكمالو و النجوم علي شهود
نبات على رضاك و نفيق على هنايا…
. و املي وحياتي مبنية على وعود
حرام عليك ...مش عليا
علاش؟
..علاش دخلت الشك في حياتي…؟.
علاش كلامك ما بقيت بيه نتيق؟
غدرتني
وغدرك ..طيار من عيني سباتي….
وغرقت في كابوس و ما بغيت نفيق
كيف ..؟
كيف عطاتك نفسك تمرر اوقاتي….
واش ماخفتيش وحد النهار نعيق ؟
فيقت و فطنت و عيقت….
نيتي غلبت .....و ربي عالم بيا
مكوية..
مكوية و ما صبرت على همومي
الطبخة و الغبينة خباطة فيا
نمسح الدمعة و نغني….
و عزة نفسي ...غلابة عليا
حرام عليك....مش عليا
ما نحاسبك ما نعاتبك…
. ما نشوفكش في الحيط مصور
مربية .
..مربية و العيب ما يخرج مني
…. بنت الناس انا ...ذهب مشحر
ما تزاوك ما ترغب غير بعاد مني….
انا دابا...فحال الزاج مشعر
تحاديه او تواليه يمشي رميم….
و مابغيت الحال يتوعر
بت الليالي .
..بت الليالي انا و الشمعة
و الدمعة من عيني سخية
.الشمعة تنحرق وتبكي عليا
و تقول
والله ما يسهل من حبك وقية
كرهت الحب
..كرهت الحب
و كرهت الشوق
ما بقالك مكان في قلبي ...
لا بزاف و لا شوية
الخير.. اللي تعملو فيك و فيا
هو درق وجهك عليا…
. و ماتقلشي حرام عليا
العيب فيك... مش فيا
ليست هناك تعليقات:
إرسال تعليق