المـــطـــــــــــــــــــــهـــــر

تطوان العتيقة
أدب وفن

المـــطـــــــــــــــــــــهـــــر

شعر وريشة/ الفنانة الشاعرة

جميلة العلوي المريبطو

المطهـــــــــــــــــر

*****

بايْتا ليلة كتقرى اللطيف 

وعينا ما شْفّْرْتْ على النعاس 

صباح الصباح وقامت بحس خفيف

كتوجّْد وتعدّْل قبل ما يدْخْلُو الناس 

ديما كان قلبا حنين و رهيف 

و اليوم كْتارْ خوفانة بلا قياس 

طهارة دْبْنَا كَتْشْوّْكْلَا لَحْمَا

وكتمنى كلشي يجوز بالرحمة 

و تكون بالسر و الهمة

السروال قندريسة مع البدعية 

والكابوط مشغول مع الفراجية

البلغة صففرة والتقيشرات بويوطين .

محددين ...مجبدين

وعلى المطرّْبة معوطين

ناضت الدار و كلشي مسرور

اللي كيطٌبّْ واللي كيهيَّء ْالفطور

وفاق الستيتُو بالهرج 

عاندو النعاس دالطيور

ماماه تْدْرَّعْ و تبوس فيه 

. و للَّاه تقولا بلا ماتزيد فيه

دمامع فعاينا خوفانة عليه 

. كتقول خلليواهلي خلليواهلي

دابا و هو جا باه يديه

و جا بالهمة و الشان وعليه السلهام 

معروف في المدينة السي الحجام

رحبو به الرجال ودخلوه نالصالة 

. شعلو الموسيقى باليدين د الآلة

ونزلت الصينيه فزين الحالة

نزلو الحلاوي و طلقو العود 

. شي كيصللي على النبي

شي كَيْوْلْوْلْ .. شي كيرد

جا باه موراه ورفدو بين يْدُّو 

ماماه عاقلة مش يخرج كتقلو رُدُّو 

تبكي وتقول الحبيب ديالي انا 

ودارو بها بالكلمة المزيانة 

وعلى ما يطهروه هزة دالماكانا

عطاوها موس تعملو بين سنانا 

ورجلا فالما بش تهبط السخانة

كلشي جاز بالرحمة د ربي مولانا

هو الحبيب ,هو الشافي, هو دوانا 

و خا اللحظة صعيبة, الله ديما معانا

وسائل تقليدية ,واصعب تجربة 

لكن الله ربي ما يخيب رجانا